library.tdpu.uz     majmua.tdpu.uz     eDarslik.tdpu.uz     asofaviy ta`lim     Pedagog     Ota-onalar uchun     Kirish          

18 aprel 2014 yil, 7,732
.

Ахbоrоt sоатi матеriаllаri 28–sоn

Unda partiyaning Oliy Majlis Qonunchilik palatasidagi fraksiyasi a’zolari, O‘zbekiston Markaziy banki, “Kamolot” yoshlar ijtimoiy harakati vakillari, “Yosh adolatchilar” qanoti yetakchilari ishtirok etdi.

Siyosat

Tashabbuskor yoshlar – el-yurt tayanchi

O‘zbekiston “Adolat” sotsial-demokratik partiyasi “Yosh adolatchilar” qanotining konferensiyasi bo‘lib o‘tdi.

Unda partiyaning Oliy Majlis Qonunchilik palatasidagi fraksiyasi a’zolari, O‘zbekiston Markaziy banki, “Kamolot” yoshlar ijtimoiy harakati vakillari, “Yosh adolatchilar” qanoti yetakchilari ishtirok etdi.

“Adolat” sotsial-demokratik partiyasi Siyosiy Kengashi raisi N.Umarov, “Yosh adolatchilar” kengashi raisi F.Omonova va boshqalar Prezidentimiz Islom Karimov rahnamoligida istiqlolning ilk yillaridanoq har tomonlama sog‘lom va barkamol avlodni voyaga yetkazish masalasi davlatimiz siyosatining ustuvor yo‘nalishlaridan biri etib belgilanganini ta’kidladi.

“Adolat” sotsial-demokratik partiyasi a’zolarining salmoqli qismini yoshlar tashkil etmoqda. Shu bois partiya dasturiy vazifalaridan kelib chiqib, navqiron avlodning siyosiy-huquqiy bilimi va faolligini oshirishga qaratilgan tizimli o‘quv ishlarini tashkil etish, yoshlarda mamlakatda va dunyoda sodir bo‘layotgan yangiliklarga nisbatan to‘g‘ri va xolis munosabatni shakllantirish, jamoatchilik ishlarida tashabbuskorlik ko‘rsata olish qobiliyatiga ega, mustaqil fikrlaydigan yoshlarni tarbiyalashga e’tibor qaratilmoqda.

– Mamlakatimizda biz, yoshlar uchun yaratilgan ulkan imkoniyatlardan foydalanib, yurt ravnaqiga hissa qo‘shishga harakat qilmoqdaman, – deydi Guliston davlat universiteti qoshidagi 1-akademik litsey o‘quvchisi, Zulfiya nomidagi Davlat mukofoti sovrindori Mahzuna Abdurasulova.

Konferensiyada yoshlar bilan ishlashda ijtimoiy sheriklik tamoyilini kuchaytirish, xususan, O‘zbekiston Respublikasi Prezidenti huzuridagi Davlat boshqaruvi akademiyasi, “Kamolot” yoshlar ijtimoiy harakati, Innovatsion texnologiyalar markazi, Nodavlat notijorat tashkilotlari milliy assotsiatsiyasi singari jamoat tashkilotlari bilan hamkorlikni kengaytirish yuzasidan fikr-mulohazalar bildirildi.

“Yosh adolatchilar” qanoti va uning barcha hududiy bo‘linmalari tomonidan o‘tgan yilda amalga oshirilgan ishlar, erishilgan yutuqlar hamda istiqboldagi rejalar atroflicha muhokama qilindi.

Iqtisodiyot

Fermerlarning ko‘makchisi

Prezidentimizning 2012-yil 22-oktabrda qabul qilingan «O‘zbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari to‘g‘risida»gi farmoniga muvofiq tashkil etilgan O‘zbekiston Fermerlari kengashi fermer xo‘jaliklari faoliyatini boshqarish va uni tashkiliy-huquqiy jihatdan mustahkamlash borasida izchil ishlarni amalga oshirmoqda.

O‘z tarkibida 8 ming 100 fermer xo‘jaligini birlashtirgan Qashqadaryo viloyati fermerlar kengashi hududda fermerlik harakatini rivojlantirish, fermer xo‘jaliklarining moddiy-moliyaviy bazasini mustahkamlash, haq-huquqlarini himoya qilish va qo‘llab-quvvatlashga alohida e’tibor qaratmoqda.

– Yangi talablarga ko‘ra, fermer xo‘jaliklarini tashkil qilish va qayta tashkil etish, ularga yer maydonlarini uzoq muddatli ijaraga berishda jamoatchilik nazorati o‘rnatilib, mazkur jarayonda tuman fermerlar kengashi raisi va a’zolarining roziligi olinishi shart qilib qo‘yildi, – deydi viloyat fermerlar kengashi raisi Baxtiyor Safarov.

Viloyat fermerlar kengashi tomonidan yerlarning meliorativ holatini yaxshilash, suvdan oqilona foydalanish masalalariga ham alohida e’tibor qaratilmoqda. 2013-yilda 12 fermer xo‘jaligining 16 gektardan ziyod yer maydonida tomchilatib sug‘orish texnologiyasi joriy etildi. G‘uzor tumanidagi “Istiqlol” fermer xo‘jaligi poliz ekinlariga tomchilatib sug‘orish usulini joriy qilib, yuqori hosildorlikka erishgan bo‘lsa, Kitob tumanidagi “Karimov O‘ktam Amirovich” fermer xo‘jaligi va Shahrisabz tumanidagi “Davron” fermer xo‘jaligi 3 gektar bog‘da mazkur texnologiya orqali suvni tejash imkoniga ega bo‘ldi. Joriy yilda ham 79 fermer xo‘jaligining 894 gektar maydonida ana shunday tejamkor usulni yo‘lga qo‘yish rejalashtirilgan.

O‘tgan yili ko‘p tarmoqli fermer xo‘jaliklari hisobidan qishloq joylarda 8 ming 363 yangi ish o‘rni yaratildi. Chorvachilik, parrandachilik, baliqchilik va asalarichilik tarmoqlari tashkil qilinib, 994 gektar maydonda intensiv va mahalliy bog‘lar, 444 gektar maydonda yangi tokzorlar barpo etildi.

Fermerlar o‘z yo‘nalishlaridan tashqari qo‘shimcha xizmat turlari ham tashkil etib, aholi bandligini ta’minlashga munosib hissa qo‘shmoqda. Yakkabog‘ tumanidagi “Sharofat ona Qahramon qizi” fermer xo‘jaligi Esat qishlog‘ida go‘zallik saloni va sartaroshxonani ishga tushirib, 5 nafar yoshni ish bilan ta’minladi.

– Prezidentimiz rahnamoligida amalga oshirilayotgan ezgu ishlarga oz bo‘lsa-da, hissa qo‘sholsak, o‘zimizni baxtiyor his etamiz, – deydi Nishon tumanidagi “Saydaliyev Muhriddin” fermer xo‘jaligi rahbari Saydali Tursunov. – Yaqinda qishlog‘imiz yoshlari uchun sun’iy qoplamali mini-futbol maydoni qurdik. Uning yonida avtomobillarning vaqtincha to‘xtash joyi, savdo do‘koni ham barpo etildi. Mazkur loyihalarni ishga tushirish orqali 15 yangi ish o‘rni yaratildi.

Ayni paytda joylardagi davlat va xo‘jalik boshqaruvi organlari, tayyorlov, ta’minotchi hamda xizmat ko‘rsatuvchi tashkilotlar bilan munosabatlar, shuningdek, ishni sudda ko‘rib chiqishda fermer xo‘jaliklarining huquq va qonuniy manfaatlarini himoya qilish viloyat va tuman fermerlar kengashlarining asosiy vazifalaridandir. Joriy yilning o‘tgan davrida fermer xo‘jaliklarining turli masalalar yuzasidan 117 murojaati ijobiy hal etilishiga ko‘maklashildi. Fermerlar kengashi tomonidan joylarda huquqiy, iqtisodiy, moliyaviy, agrotexnik va boshqa masalalar bo‘yicha konsalting markazlari tashkil etish yuzasidan kompleks chora-tadbirlar ishlab chiqilgan. Unga ko‘ra, Kitob, Qamashi, Mirishkor va Qarshi tumanlari fermerlar kengashi qoshida konsalting markazlari, qishloq xo‘jaligi kasb-hunar kollejlari qoshida fermerlarni qayta tayyorlash va o‘qitish uchun maxsus kurslar tashkil etilmoqda.

Jamiyat

Do‘stlik va hamjihatlik festivali

Prezidentimiz Islom Karimov rahnamoligida mamlakatimizda millatlararo totuvlik, ahillik va hamjihatlikni asrash, xalqimizga xos bag‘rikenglik, mehr-oqibat, muruvvat va saxovat tuyg‘ularini yanada mustahkamlashga alohida e’tibor qaratilmoqda. Yurtimizda istiqomat qilayotgan barcha millat va elatlarning o‘z ona tili, qadriyat va urf-odatlari, tarixi va madaniyatini o‘rganishi hamda rivojlantirishi uchun zarur sharoit yaratilmoqda.

Davlatimiz rahbari tashabbusi bilan 1992-yilda tashkil etilgan Respublika baynalmilal madaniyat markazi va uning joylardagi bo‘limlari ana shu e’tibor va g‘amxo‘rlikning amaldagi namunasidir.

Buxoro viloyatidagi milliy madaniyat markazlarining samarali faoliyat yuritishi, turli millatlarning o‘ziga xos madaniyati, an’ana va qadriyatlarini asrab-avaylash, yanada rivojlantirish uchun barcha sharoit muxayyo qilingan.

Mazkur markazlarning asosiy maqsad va vazifalari jamiyatimizda millatlar o‘rtasida qaror topgan ahillik, totuvlik va bag‘rikenglik tamoyillarini yanada mustahkamlash, ushbu ezgu maqsadga qaratilgan jamoatchilik tashabbuslarini qo‘llab-quvvatlash, milliy an’ana va qadriyatlarni asrab-avaylash, rivojlantirish, keng targ‘ib etishga hissa qo‘shishdan iborat. Markazlar tomonidan tashkil etilayotgan madaniy-ma’rifiy anjumanlar, turli mavzulardagi uchrashuv va davra suhbatlari yoshlarimizni Vatanga muhabbat, istiqlol g‘oyalariga sadoqat ruhida tarbiyalashga xizmat qilmoqda.

Sog‘lom bola yiliga bag‘ishlab Buxoro viloyati hokimligi va viloyatdagi milliy madaniyat markazlari hamkorligida “O‘zbekiston – yagona oila” shiori ostida o‘tkazilgan do‘stlik festivalida bu haqda alohida ta’kidlandi.

Bugungi kunda viloyatda 110 dan ziyod turli millat va elat vakillari yagona oila farzandlaridek ahil-inoq yashamoqda. Ular barcha fuqarolar kabi Bosh Qomusimizda belgilangan huquq va erkinliklardan keng foydalangan holda mamlakatimiz ijtimoiy-siyosiy hayotida faol ishtirok etib kelmoqda.

– Respublikamizda, jumladan, Buxoro viloyatida o‘qitish qozoq tilida olib boriladigan ko‘plab maktablar bor. Farzandlarimiz ona tilida saboq olishi uchun barcha sharoit yaratib berilgan, – deydi Qorovulbozor tumanidagi 18-bolalar musiqa va san’at maktabi o‘qituvchisi Gulmira Bekbautova. – San’at maskanimizda qozoq kuy-qo‘shiqlari va raqslari bo‘limi tashkil etilib, “Aynur” folklor-etnografik ansambli faoliyat ko‘rsatmoqda. Barchamiz uchun yagona bo‘lgan mana shu muqaddas diyorda turli millat vakillari bilan tinch-ahil, hamjihat bo‘lib yashab kelayotganimizga shukronalar aytamiz. Bu Prezidentimiz olib borayotgan oqilona siyosat, mamlakatimizda hukm surayotgan tinchlik va barqarorlik samarasidir.

Tadbir doirasida milliy madaniy markazlar tomonidan milliy liboslar va taomlar ko‘rgazmasi, turli xalqlar o‘rtasidagi do‘stlik aloqalari aks etgan tasviriy san’at asarlari namoyish etildi.

Festivalda turli milliy madaniy markazlar qoshidagi badiiy jamoalar, taniqli san’atkorlar tomonidan ijro etilgan O‘zbekiston, do‘stlik, tinchlik, muhabbat va yoshlikni tarannum etuvchi kuy-qo‘shiqlar dillarni yanada yaqinlashtirdi.

Texnologiyalar

Dasturiy mahsulotlar – zamon talabi

Har bir mamlakatning ertasi va kelajagi qanday bo‘lishi ko‘p jihatdan yoshlarining qay darajada ta’lim-tarbiya olayotgani bilan belgilanadi. Zero, Vatan taraqqiyoti, millat istiqboli shu zaminda voyaga yetayotgan o‘g‘il-qizlarning kamoli bilan chambarchas bog‘liqdir. Shu ma’noda rivojlangan demokratik davlat barpo etish jarayonida murakkab va keng ko‘lamli vazifalarni hal etishga qodir yangi avlodni tarbiyalash masalasi muhim ahamiyatga ega.

Toshkent axborot texnologiyalari universitetining Urganch filialida olti yuzga yaqin talaba ta’lim olmoqda. Yoshlarning zamonaviy kommunikatsiya texnologiyalaridan foydalanish imkoniyatini kengaytirish, ularda internet tarmog‘i orqali olinayotgan axborotlarni samarali qo‘llash ko‘nikmasini shakllantirish hamda axborot-resurs markazlarida elektron axborot hajmi va sifatini oshirishga alohida e’tibor qaratilmoqda.

Jumladan, talabalar va professor-o‘qituvchilarning axborotga bo‘lgan ehtiyojini ta’minlash maqsadida oliy ta’lim muassasasi zamonaviy komputer texnikasi, dasturiy vositalar bilan jihozlanmoqda.

Yaratilayotgan imkoniyatlardan samarali foydalanib, katta yutuqlarga erishayotgan talabalar ko‘pchilikni tashkil etadi. Filialning 3-bosqich talabasi Artur Temurov ana shunday yoshlardan biri.

O‘tgan yili u respublika oliy o‘quv yurtlari talabalari o‘rtasida Xorazmda o‘tkazilgan “Talabalar bahori – 2013” festivali doirasida tashkil etilgan iqtidorli talabalar tanlovida o‘zining “Ta’limda android tizimidagi mobil ilovalarni qo‘llash” loyihasi bilan g‘oliblikni qo‘lga kiritgan edi. Shuningdek, “ICTExpo – 2013” an’anaviy axborot texnologiyalari milliy ko‘rgazmasi hamda “Yurt kelajagi” respublika tanlovida ham muvaffaqiyatli ishtirok etdi.

– Prezidentimiz rahnamoligida dasturiy mahsulotlar bozori jadal rivojlanmoqda, – deydi Artur. – Buning natijasida telekommunikatsiya infratuzilmasini, mobil aloqa va boshqa xay-tek mahsulotlarini rivojlantirishga qaratilgan yirik loyihalar hayotga tatbiq etilayotir. Boshqacha aytganda, mamlakatimiz iqtisodiyotini modernizatsiya qilishning yuqori texnologiyali bazasi shakllantirilmoqda.

Ayni paytda yosh tadqiqotchi o‘zi yaratgan “Ta’limda android tizimidagi mobil ilovalarni qo‘llash” dasturini takomillashtirish, PDF formatidagi hujjatlarni android tizimiga kiritish hamda ushbu tizimda ta’lim muassasalari uchun elektron dalolatnoma yaratish ustida ish olib bormoqda.

Sport

“Barkamol avlod” sari

Prezidentimiz Islom Karimov tashabbusi bilan tashkil etilgan “Umid nihollari”, “Barkamol avlod” va Universiada sport o‘yinlari mamlakatimiz yoshlari o‘z iqtidori va salohiyatini namoyon etishi uchun katta imkoniyat yaratayotgani quvonarlidir.

Ayni kunlarda akademik litsey va kasb-hunar kollejlari o‘quvchi-yoshlari Namangan viloyatida o‘tadigan “Barkamol avlod – 2014” musobaqalari final bosqichi yo‘llanmasini qo‘lga kiritish uchun qizg‘in hozirlik ko‘rayotir. Hududlarda terma jamoalar shakllantirilib, jamoaviy sport turlari bo‘yicha saralash bosqichlari o‘tkazilmoqda.

Poytaxtimizda futbol bo‘yicha Qoraqalpog‘iston Respublikasi, Toshkent shahri va barcha viloyatlardan kelgan jami o‘n to‘rtta jamoa ishtirokida o‘tkazilgan musobaqa ham “Barkamol avlod – 2014” sport o‘yinlarining mamlakat bosqichiga saralash vazifasini o‘tab berdi.

Qariyb bir hafta davom etgan bahslarda raqiblaridan har tomonlama ustunligini namoyish etgan Toshkent shahri, Toshkent va Qashqadaryo viloyatlari jamoalari nufuzli sport musobaqasining finalida ishtirok etish imkoniga ega bo‘ldi.

“Barkamol avlod – 2014” o‘yinlari mamlakat bosqichining oxirgi yo‘llanmasi uchun bahs O‘zbekiston futbol federatsiyasi maydonida Sirdaryo va Samarqand viloyatlari futbolchilari o‘rtasida bo‘lib o‘tdi.

– Saralash bahslariga puxta tayyorgarlik ko‘rdik, – deydi Sirdaryo viloyati jamoasi bosh murabbiyi Jahongir Murodqosimov. – Jamoamiz a’zolari Guliston markaziy stadionida tashkil etilgan o‘quv-mashg‘ulot yig‘inlarida tajriba va mahoratini oshirdi. “Guliston”, “Zomin” va “Lokomotiv BFK” klublari bilan o‘rtoqlik uchrashuvlarida qatnashdi.

Jamoaning ahilligi, futbolchilarning g‘alabaga ishtiyoqi besamar ketmadi. Poytaxtimizda o‘tgan mintaqaviy bosqichda sirdaryolik yoshlar surxondaryolik tengdoshlarini 2:1, qoraqalpog‘istonlik futbolchilarni 1:0 hisobida yengdi. Samarqandlik yoshlarga qarshi kechgan hal qiluvchi bahsda Shahzod Turdibekov, Shoxruh To‘xtaboyev va Jahongir Qurbonboyevning goli evaziga 3:1 hisobida g‘alaba qozongan sirdaryoliklar “Barkamol avlod – 2014” sport o‘yinlarining final bosqichiga yo‘llanma oldi.

– Saralash bosqichida muvaffaqiyatli ishtirok etib, Namangan viloyatiga borish imkoniyatiga ega bo‘lganimizdan behad xursandmiz, – deydi Guliston shahridagi 2-pedagogika kolleji o‘quvchisi Shoxruh Eshbo‘taev. – “Barkamol avlod” musobaqalari bizni ulkan marralar sari ruhlantiruvchi katta sport anjumanidir.

Axborot manbasi: O‘zA

18 aprel 2014 yil, O`qilgan:7732



Xabar qoldirish

Agar Sizda universitetimiz faoliyati bo`yicha masalalar/muammolar,
ariza, shikoyat yoki takliflar bo`lsa
virtual qabulxona
orqali qoldirishingiz mumkin

Ushbu sahifa bo`yicha fikringizni esa quyida qoldirishingiz mumkin



Ismi sharifingiz:

E-mail:

Fikringiz :
Ximoya kodini kiriting :


Bizning loyihalar